Programi “Punishtja e Demokracisë” përbën një nga shtyllat kryesore të edukimit qytetar në Kuvendin e Shqipërisë. Ky program mbështetet në modelin e krijuar nga Parlamenti Austriak, dhe zbatohet në Kuvendin e Shqipërisë prej 1 mars 2023.

Punishtja është një aktivitet që i mundëson nxënësve të grupmoshës 8 - 14 vjeç të mësojnë me metoda informale të të nxënit mbi:

• Sistemi politik demokratik në shoqëri
• Roli dhe funksionet e Kuvendit
• Rëndësia e aktivizmit qytetar
• Roli i medias
• Vlerat, të drejtat dhe detyrimet e anëtarësimit në Bashkimin Europian

Gjatë punishtes, nxënësit hulumtojnë dhe diskutojnë mbi temat e mësipërme, kryejnë intervista me deputetë dhe krijojnë histori fototgrafike.

Punishtja e Demokracisë zhvillohet në ambientet e Kuvendit të Shqipërisë tre herë në javë, përgjatë orarit 09:00-13:00. Në fund të sesioneve të drejtuara nga 4 trajnere të kualifikuara, pjesëmarrësit prodhojnë një gazetë.