"Kuvendi Vjen Tek Ju" ka për qëllim të edukojë të rinjtë për punën e Kuvendit dhe rolin përfaqësues të deputetëve. Nëpërmjet edukimit, sesionet nxisin qytetarinë aktive me fokus angazhimin e të rinjve në proceset vendimmarrëse, në veçanti me Kuvendin. Përveç nxitjes së një kulture të përgjegjësisë qytetare, ku të rinjtë ndjejnë se zëri i tyre dëgjohet dhe janë pjesë e proceseve, kjo nismë synon të ndihmojë në rritjen e besimit ndaj institucionevΩe publike dhe demokracisë.

Përmes sesioneve informuese, Edukimi Qytetar organizon takime në të gjitha qytetet e Shqipërisë me grupmosha të ndryshme, në bashkëpunim me institucione arsimore dhe organizata lokale të shoqërisë civile. Kohëzgjatja e takimit është 2 orë.

Përgjatë takimeve, pjesëmarrësit njihen me tematikat e mëposhtme:

• Roli i transparencës parlamentare dhe mekanizmat e Kuvendit në funksion të qytetarëve, për të siguruar pjesëmarrjen dhe angazhimin.
• Puna e deputetit në zonat elektorale (Java e Gjelbër).
• Nismat ligjore, peticionet dhe seancat dëgjimore.
• Programet edukuese për t`u njohur me rolin e Kuvendit dhe procesin parlamentar.